Hyd: 40 munud

Pellter: 1.2 cilometr

Dechrau: SH 650 603

Diwedd: SH 655 594

Parcio: Maes Parcio Ogwen, Bethesda, Bangor LL57 3LZ

Er mae'r daith yn edrych yn fyr, mae'n heriol ac yn serth mewn mannau. Gallwch gerdded yr un ffordd nôl i'r maes parcio.

Mae'r daith yn dechrau o faes parcio'r Ymddiriedolaeth Genedlaethol. Dewch allan o'r maes parcio, a throwch i'r dde, cerddwch am 200 metr ac fe gyrhaeddwch Bwynt Golygfa Nant Ffrancon (A) i'r Gogledd.

O fan hyn, cerddwch nôl heibio'r maes parcio, a chyn cyrraedd y brif heol, ewch tuag at Ganolfan Ogwen, a fe welwch Wal Darwin (B) wrth flaen y ganolfan. Wrth edrych ar Ganolfan Ogwen, cerddwch lawr yr ochor chwith ac ymunwch â'r llwybr droed. Cerddwch am tua 200 medr, ar draws yr afon, ac fe welwch Gylch Llechi ar y chwith (C). Parhewch i ddringo, ac ar ôl 200 medr arall, bydd y prif lwybr yn troi i'r dde tuag at Gwm Idwal, trowch i'r chwith er mwyn dilyn y llwybr llai tuag at Llyn Bochlwyd (Ch). Parhewch i ddringo yn ofalus ar y llwybr serth am 800 medr, gan gadw Nant Bochlwyd ar eich chwith. Byddwch yn cyrraedd terfyn y daith, Llyn Bochlwyd (Ch). Gallwch ddilyn yr un llwybr nôl at y maes parcio.

a) Pwynt Golygfa Nant Ffrancon

Cyfeirnod Grid: SH 647 603

Mae Nant Ffrancon yn ddyffryn rhewlifol, sydd yn siâp 'U' amlwg. Dyma le mae'r dyffryn yn cychwyn, a gallwch weld y Glyderau uwchben yr ochor Orllewinol, a'r Carneddau uwchben yr ochor Ddwyreiniol o'r pwynt hwn.

b) Wal Darwin

Cyfeirnod Grid: SH 649 603

Mae'r Wal Darwin yn gofnod daearegol o daith Charles Darwin ar draws Eryri ym 1831. Aeth i fyny Nant Ffrancon i Ogwen, o gwmpas Cwm Idwal ac yna ymlaen i Ffestiniog heibio Capel Curig, ac yna ar draws y Rhinogydd at yr arfordir gan orffen yn Abermaw. Nid yw union fanylion ei daith gyfan ar gael, ond mae'r creigiau yn y Wal yn cynrychioli'r rhai a groesodd, aeth yn agos iddynt, ac mewn rhai achosion, rhai a archwiliodd.

c) Cerrig Ffenestr Llechi Ogwen

Cyfeirnod Grid: SH 650 602

Mae yna gyfanswm o chwech o Gerrig Ffenestr Llechi wedi'i osod ar ochor y llwybr mewn cylch, pob un yn edrych ar gopa mynyddoedd gwahanol sef Tryfan, Glyder Fach, Glyder Fawr, Foel Goch, Carnedd Y Filliast a Pen Yr Ole Wen.

Ch) Llyn Bochlwyd

Cyfeirnod Grid: SH 654 592

Yn ôl chwedl leol, dyma lle diancodd hen stag lwyd rhag heliwr, yn wyrthiol trwy neidio o uchder mawr i'r llyn a nofio i ddiogelwch wrth ddal ei bochau llwyd uwchben yr wyneb, er mwyn anadlu.