01 Tachwedd 2007

  Roedd cyfraniad Ray Gravell i raglenni S4C dros y chwarter canrif ddiwethaf yn enfawr.

Sylwebodd ar y darllediad teledu cyntaf erioed yn y Gymraeg o gêm rygbi ryngwladol – y gêm rhwng Cymru a Lloegr yn Chwefror 1983 – a hynny ochr yn ochr â Huw Llywelyn Davies.

Roedd Ray hefyd yn enwog fel sylwebydd ochr-y-maes. Roedd ei anwyldeb a’i hiwmor yn ennyn y gorau o’r chwaraewyr rygbi ’roedd yn eu cyfweld.

Fe wnaeth ymddangosiad arbennig ar sawl drama deledu ac roedd yn actor dawnus. Fe wnaeth ei farc hefyd fel cyflwynydd poblogaidd ar y teledu a’r radio.

Ddechrau’r flwyddyn fe ymddangosodd yng nghystadleuaeth gorawl S4C Codi Canu fel capten i gôr cefnogwyr y Sgarlets, tîm oedd mor agos at ei galon. Llwyddodd ei frwdfrydedd a’i egni diddiwedd i ysbrydoli aelodau’r côr, felly hefyd pawb a’i cyfarfu.

Meddai Iona Jones, Prif Weithredwr S4C, “Mae pawb yn S4C wedi’u syfrdanu gan y newyddion trist am farwolaeth Ray Gravell. Rydym yn estyn cydymdeimlad dwys a diffuant i’w deulu. Roedd Grav yn gymeriad unigryw - personoliaeth gynnes, annwyl ac yn Gymro i’r carn. Chwaraeodd rôl bwysig yn rhaglenni S4C ar hyd y chwarter canrif ddiwethaf - fel sylwebydd, cyflwynydd ac actor - a bydd colled enfawr ar ei ôl.”

Diwedd

Newidiadau i amserlen S4C:

Nos Iau 1 Tachwedd

7.00pm  

Wedi 7   

Bydd teyrnged arbennig i Ray Gravell ar y rhaglen.

7.30pm  

Newyddion 

Bydd y rhaglen yn cynnwys adroddiad estynedig.

9.00pm  

Grav ar Grwydr 

Yn y bennod hon o’r gyfres a ddarlledwyd yn 1998 gwelwn Ray Gravell yn ymweld â’i hoff ddinas, Dulyn.

Bydd S4C hefyd yn darlledu rhaglen deyrnged arbennig i Ray Gravell o fewn yr wythnosau nesaf.