Mae S4C wedi llwyddo i gael 31 o enwebiadau BAFTA Cymru eleni wrth i'r rhestr gael ei gyhoeddi ddydd Mercher, 6 Medi.
Ar frig yr enwebiadau i S4C mae'r gyfres ddrama Un Bore Mercher / Keeping Faith (Vox Pictures) gyda chwe enwebiad gan gynnwys categori Actor i Mark Lewis Jones, categori Actores i Eve Myles, categori Dylunio Gwisgoedd i Sarah Jane Perez, Cerddoriaeth Wreiddiol i Amy Wadge a Laurence Love Greed, categori Ffotograffiaeth a Goleuo i Steve Lawes ac enwebiad i Mathew Hall yn y categori Awdur.
Hefyd mae pum enwebiad yr un i ddramâu poblogaidd Bang (Joio) a Craith (Severn Screen) gan gynnwys Rhodri Meilir yn Craith yn y categori Actor a Gwyneth Keyworth yn y categori Actores.
Mae Zoe Howerska wedi ei henwebu yn y categori Dylunio Gwisgoedd ar gyfer Bang ac yng nghategori y Cyfarwyddwr mae Gareth Bryn wedi ei enwebu ar gyfer Craith a Philip John ar gyfer Bang. Yn ogystal, yn y categori Golygu mae Dafydd Hunt ar gyfer Bang a Sara Jones ar gyfer Craith. Hefyd mae Stuart Biddlecombe wedi derbyn enwebiad ar ran Craith yn y categori Ffotograffiaeth a Goleuo a Roger Williams yn y categori Awdur ar gyfer Bang.
Mae cyfres boblogaidd Parch wedi derbyn enwebiad yng nghategori y ddrama deledu orau.
Mae S4C hefyd wedi llwyddo i fachu'r holl enwebiadau yn y categori Rhaglen Blant gyda CIC (Boom Cymru), Deian a Loli (Cwmni Da) a enillodd wobr BAFTA yn 2017 a Titsh (Cwmni Da).
Mae tri enwebiad i S4C hefyd yn y categori Rhaglen Adloniant sef Only Men Aloud in Bollywood (Boom Cymru), Y Salon (Boom Cymru) ac Uchafbwyntiau Eisteddfod Genedlaethol 2017 (BBC Cymru).
Mae'r ddarlledwraig Beti George hefyd wedi derbyn enwebiad yn y categori cyflwynydd am ei rhaglen ddirdynnol Beti George: Colli David (Silin).
Ymhlith y nifer lu o enwebiadau eraill mae rhaglen Cerys Matthews a'r Goeden Faled (Boom Cymru) wedi ennill enwebiad yn y categori Cyfres Ffeithiol a rhaglen Newyddion 9 Ymosodiad Manceinion (BBC Cymru) yn y categori Newyddion a Materion Cyfoes.
Wrth longyfarch pawb sydd wedi derbyn enwebiad dywedodd Cyfarwyddwr Cynnwys S4C, Amanda Rees: "Ry' ni'n hynod falch o'r holl gynyrchiadau sydd wedi eu henwebu ar gyfer gwobrau anrhydeddus BAFTA Cymru 2018. Tra bod drama yn amlwg ar y brig, gyda nifer fawr o enwebiadau i Un Bore Mercher, Craith a Bang, mae'r rhestr gyfan yn dangos safon ac ehangder gwasanaeth S4C ar draws pob genre. Ry' ni wedi hawlio'r tri enwebiad yn y categori Plant, o ganlyniad i'n hymroddiad i gomisiynu cynnwys gwreiddiol ar gyfer plant, ac mae'r rhestr yn dathlu rhaglenni ffeithiol, adloniant, materion cyfoes, celfyddydau, a mentergarwch digidol hefyd. Rydw i'n falch iawn o bob un, a dymuniadau gorau i bawb yn y seremoni wobrwyo."
Bydd yr enillwyr yn cael eu cyhoeddi mewn seremoni a arweinir gan Huw Stephens ar 14 Hydref 2018 yn Neuadd Dewi Sant Caerdydd.
Y rhestr lawn o enwebiadau BAFTA Cymru i gomisiynau S4C yw:
Actor: Mark Lewis Jones, Steve Baldini yn Keeping Faith/ Un Bore Mercher (Vox Pictures)
Rhodri Meilir, Dylan Harris yn Craith (Severn Screen)
Actores: Eve Myles, Faith Howells yn Keeping Faith/ Un Bore Mercher (Vox Pictures)
Gwyneth Keyworth, Megan yn Craith (Severn Screen)
Rhaglen Blant: Cic (Boom Cymru)
Deian a Loli (Cwmni Da)
Titsh (Cwmni Da)
Dylunio Gwisgoedd: Sarah Jane Perez, Keeping Faith/ Un Bore Mercher (Vox Pictures)
Zoe Howerska, Bang (Joio)
Cerddoriaeth Wreiddiol: Amy Wadge/ Laurence Love Greed, Keeping Faith/ Un Bore Mercher
Ffotograffiaeth a Goleuo: Steve Lawes, Keeping Faith/ Un Bore Mercher (Vox Pictures)
Stuart Biddlecombe, Craith (Severn Screen)
Ffotograffiaeth Ffeithiol: Aled Jenkins, Y Ditectif (ITV Cymru)
Cyflwynydd: Beti George, Beti George: Colli David (Silin)
Ffilm Fer: Beddgelert (Bad Wolf)
Sain: John Markham, Band Cymru 2018 (Rondo Media)
Cyfarwyddwr Ffuglen: Gareth Bryn, Craith (Severn Screen)
Philip John, Bang (Joio)
Golygu: Dafydd Hunt, Bang (Joio)
Sara Jones, Craith (Severn Screen)
Rhaglen Adloniant: Only Men Aloud in Bollywood (Boom Cymru)
Y Salon (Boom Cymru)
Uchafbwyntiau Eisteddfod Genedlaethol 2017 (BBC Cymru)
Cyfres Ffeithiol: Cerys Mathews a'r Goeden Faled (Boom Cymru)
Gêm: Byd Cyw (Thud Media/ Boom Cymru)
Newyddion a Materion Cyfoes: Newyddion 9 Ymosodiad Manceinion (BBC Cymru)
Drama Deledu: Parch (Boom Cymru)
Awdur: Jeff Murphy, Hinterland (Fiction Factory)
Mathew Hall, Keeping Faith/ Un Bore Mercher (Vox Pictures)
Roger Williams, Bang (Joio)
