25 Mehefin 2021
Mae ITV Cymru, mewn partneriaeth gyda S4C, unwaith eto yn chwilio am ddau berson brwdfrydig sydd eisiau datblygu gyrfa ym myd newyddiaduraeth yn y Gymraeg.
Mae'r cynllun hyfforddi arloesol, sy'n bartneriaeth rhwng S4C ac ITV, yn rhedeg am y pedwerydd tro eleni ac yn rhan o ymrwymiad S4C i roi cyfle i bobl sy'n cael eu tangynrychioli yn y sector i weithio yn y maes.
Bydd y ddau ymgeisydd llwyddiannus yn dilyn cynllun hyfforddiant am 12 mis a chael y profiad o weithio ar y rhaglenni materion cyfoes mae ITV yn creu ar gyfer S4C, rhaglenni fel Y Byd ar Bedwar ac Y Byd yn ei Le.
Byddant hefyd yn dysgu creu cynnwys materion cyfoes ffurf fer ar gyfer cynulleidfa Hansh Dim Sbin ar draws y cyfryngau cymdeithasol ac i wasanaethau newyddion digidol S4C.
"Rydym ni mor falch o'r bartneriaeth gydag S4C i wireddu'r cynllun hyfforddiant yma eto eleni a'r ymrwymiad pellach i ddatblygu cenhedlaeth newydd o newyddiadurwyr drwy gyfrwng y Gymraeg." dywedodd Branwen Thomas, Golygydd Rhaglenni Cymraeg ITV Cymru
"Mae'n gyfle cyffrous i greu cynnwys materion cyfoes i Hansh Dim Sbin a datblygu sgiliau digidol fydd yn allweddol i unrhyw yrfa ym maes newyddiaduraeth yn y dyfodol."
Lloyd Lewis a Maia Davies oedd y ddau a enillodd eu lle ar y cynllun hyfforddi y llynedd, ac mae'r ddau wedi cael profiadau gwerthfawr iawn yn gweithio yn y maes ac yn datblygu eu sgiliau.
"Er mae wedi bod yn flwyddyn ryfedd gyda Covid, mae'r cynllun newyddiadurwr dan hyfforddiant eleni wedi bod yn brofiad gwych o ran cael blas o'r diwydiant a dwi wedi mwynhau'n fawr iawn.
"Yr uchafbwyntiau i fi oedd cael mynd mas a chynnal a ffilmio cyfweliadau â chyfranwyr.
"Fy nghyngor i rywun sydd rhwng dau feddwl am neud cais neu beidio bydd gwnewch e! Does dim byd i golli a phrofiadau unigryw i'w ennill." meddai Lloyd.
"Mae'r cynllun hyfforddiant yn gyfle grêt i weithio gyda thîm o newyddiadurwyr profiadol sydd bob tro'n barod i'ch cefnogi chi i ddysgu a gwella.
"Rydw i wedi mwynhau cael rhyddid i ddilyn y straeon sydd o ddiddordeb i mi, a gallu bod yn greadigol wrth weithio gyda phlatfformau digidol.
"Os ydych chi mewn dwy feddwl am wneud cais, rhowch dro arni – 'sdim angen llwyth o brofiad, dim ond eich bod chi'n greadigol ac yn barod i weithio'n galed!" ychwanegodd Maia
Meddai Rhodri ap Dyfrig, Comisiynydd Cynnwys Ar-lein S4C:
"Rydyn ni'n falch iawn o allu ymestyn y cynllun hwn eto eleni ar ôl llwyddiant y blynyddoedd diwethaf.
"Mae rhoi llwyfan i newyddiaduraeth gyfoes a barn pobol ifanc am beth sy'n digwydd yn y byd o'u cwmpas yn ychwanegiad pwysig at Hansh, ac yn lle i ddatblygu technegau gwbl gyfoes o drafod materion Cymru a'r byd."
Dyma gyfle arbennig i rywun sydd â diddordeb brwd mewn newyddion a materion cyfoes ac eisiau dilyn gyrfa bellach fel Newyddiadurwr.
Mae'r dyddiad cau ar Fehefin 30 ac mae'r cynllun hyfforddiant yn gytundeb 12 mis: https://itv.referrals.selectminds.com/jobs/trainee-journalist-609
