Mae isdeitlau yn gymorth hanfodol i ni allu sicrhau mynediad at ein rhaglenni i bawb, ac maen nhw hefyd yn adnodd defnyddiol iawn i'r rheiny sy'n dysgu neu'n gwella sgiliau iaith.
Os dych chi'n gwylio ein rhaglenni ar deledu llinol neu arferol, neu ar BBC iPlayer, dych chi'n gallu troi is-deitlau Saesneg ymlaen. Ond os dych chi'n gwylio ar wasanaeth S4C Clic mae hefyd yr opsiwn o gael isdeitlau Cymraeg ar y rhan fwyaf o'n rhaglenni, sy'n cynnig llawer o bosibiliadau.
Os dych chi ddim yn deall pob gair pan dych chi'n dechrau gwylio heb isdeitlau, mae hynny'n hollol normal – am sbel bydd yn teimlo fel dych chi'n dditectif sy'n dilyn y cliwiau yn y geiriau dych chi wedi eu deall. Ond os dych chi'n gallu dod i arfer â'r teimlad braidd yn anghyfforddus hwn, bydd yn gwella eich dealltwriaeth o Gymraeg llafar yn gyflymach. Ar ôl ychydig o wythnosau, ewch yn ôl at y rhaglen gyntaf wylioch chi heb isdeitlau, a bydd yn eich synnu chi faint dych chi'n gallu ei ddeall!
Mae'r gwasanaeth isdeitlau Cymraeg wedi'i gynllunio ar gyfer dysgwyr Cymraeg, ac i bobl f/Fyddar Cymraeg eu hiaith i fwynhau rhaglenni Cymraeg S4C.
Mae'r isdeitlau yn addas ar gyfer y di-Gymraeg, aelwydydd ieithyddol cymysg a phobl f/Fyddar.
Mae gwasanaeth sain ddisgrifio ar gael ar gyfer y deillion a'r rhannol ddall. Mae'r gwasanaeth hwn yn cynnwys disgrifiadau ychwanegol sy'n cyfoethogi mwynhad y gwyliwr.
Os dych chi'n gwylio S4C Clic ar gyfrifiadur, mae'n bosib i chi ddefnyddio byrlwybr teipio (keyboard shortcuts) er mwyn toglo rhwng y mathau gwahanol o isdeitlau, yn ogystal â neidio ymlaen neu yn ôl a chymryd saib.
