16 Ebrill 2009
Mae Martha, Jac a Sianco, ffilm bwerus S4C am etifeddiaeth a thorcalon teuluol, wedi derbyn wyth enwebiad yng ngwobrau BAFTA Cymru 2009, gan gynnwys y Ffilm Orau, yr Actores Orau ar gyfer Sharon Morgan a’r Actor Gorau ar gyfer Ifan Huw Dafydd.
Mae’r enwebiadau yma ymhlith y 47 a dderbyniodd S4C am amrywiaeth eang o gynhyrchiadau.
Mae cynyrchiadau drama eraill S4C yn amlwg hefyd yn y rhestr enwebiadau. Mae Con Passionate, sy’n dilyn hynt a helynt côr meibion, a’r ddrama ddinesig Caerdydd wedi cael eu henwebu yn y categori Cyfres Ddrama Orau ar gyfer Teledu. Mae’r cyfresi drama yma hefyd wedi cael eu henwebu ar gyfer y wobr Awdur Gorau ar gyfer y Sgrin, gyda Siwan Jones, awdur Con Passionate, a Roger Williams, awdur Caerdydd, yn cystadlu am y brif wobr.
Cafodd y gyfres ddrama am giangsters, Y Pris, hefyd ei henwebu ar gyfer ystod o wobrau gan gynnwys Cyfarwyddwr Ffotograffiaeth Gorau: Drama a’r Cyfarwyddwr Gorau: Ffilm/Drama.
Mae Shelley Rees, sy’n chwarae un o brif gymeriadau’r gyfres 2 Dŷ a Ni, wedi derbyn enwebiad yng nghategori’r Actores Orau, tra bod Ryland Teifi, sy’n portreadu Peter yn Caerdydd, yn y ras am wobr yng nghategori’r Actor Gorau.
Mae’r gyfres ddrama ar gyfer pobl ifainc, Rownd a Rownd, yn derbyn enwebiad yn y categori Rhaglen Ieuenctid Orau. Mae’r sioe gylchgrawn Uned 5 a’r sioe gerddoriaeth Bandit ar yr un rhestr fer. Mae cyflwynydd Uned 5, Mari Lovgreen, enillydd Gwobr Newydd Ddyfodiad Gorau BAFTA Cymru 2006, wedi cael ei henwebu yn y categori Cyflwynydd Gorau.
Mae rhaglenni ffeithiol S4C yn amlwg hefyd. Mae Natur Cymru, y gyfres drawiadol am dirwedd a bywyd gwyllt Cymru, yn derbyn enwebiad ar gyfer y Rhaglen Ffeithiol Orau a’r Camera Gorau: Heblaw Drama. Mae rhifyn o’r gyfres ddogfen Afon, sy’n canolbwyntio ar yr afon Yangtzee, hefyd wedi ei henwebu ar gyfer gwobr Camera Gorau: Heblaw Drama.
Mae’r gyfres materion cyfoes Y Byd ar Bedwar a’r rhaglenni dogfen Rygbi: Y Gêm Agored ac America 08: Dewi Llwyd ar Daith hefyd wedi cael eu henwebu am wobrau.
Mae S4C wedi derbyn ystod o enwebiadau am ei rhaglenni cerddoriaeth. Un o’r cynyrchiadau dderbyniodd enwebiad oedd darllediad o gynhyrchiad Opera Cenedlaethol Cymru, Falstaff - Yr Opera, a welodd Bryn Terfel yn y brif ran. Cafodd Nodyn, a gyflwynir gan y gantores Elin Fflur, enwebiad am y Rhaglen Gerdd Orau a Chyfarwyddwr Goleuo Gorau: Heblaw Drama. Mae Gala Operatig Gŵyl y Faenol wedi cael ei henwebu yn y categorïau Sain Gorau a Chyfarwyddwr Goleuo Gorau: Heblaw Drama. Mae’r cyngerdd Grand Slam hefyd wedi cael ei henwebu yn y categori Cyfarwyddwr Goleuo Gorau: Heblaw Drama.
Mae Y 7 Magnifico a Matthew Rhys, a ddilynodd griw o sêr o Gymru yn dysgu bod yn gowbois ar y paith yn Arizona, yn derbyn enwebiad yn y categori Adloniant Ysgafn.
Cafodd Nadolig Plentyn yng Nghymru, sydd wedi ei seilio ar glasur Dylan Thomas, enwebiad am wobr Animeiddio Gorau. Mae Eliffantod, ffilm animeiddio fer gan Sally Pearce, a enillodd ysgoloriaeth S4C i fynychu’r Ysgol Ffilm a Theledu Genedlaethol, wedi derbyn enwebiad yn y categori Ffilm Fer Orau.
Mae’r gyfres animeiddio ar gyfer plant, Holi Hana, a enillodd y wobr Animeiddio Gorau yng ngwobrau BAFTA Cymru y llynedd, wedi cael ei henwebu ar gyfer Rhaglen Blant Orau, ynghyd â’r sioe Hip neu Sgip.
Mae tri chynhyrchiad gan S4C, Byw yn yr Ardd, Cwm Glo Cwm Gwyrdd a Lle Aeth Pawb? wedi cael eu henwebu yn y categori Dylunio Graffeg Gorau.
Meddai Rhian Gibson, Cyfarwyddwr Comisiynu S4C, “Mae’n gryn gamp i dderbyn 47 enwebiad ar gyfer gwobrau BAFTA Cymru eleni mewn ystod mor eang o gategorïau, o ddrama i ddogfen, newyddion a materion cyfoes, plant ac adloniant ysgafn.
“Rwy’n arbennig o falch am y gydnabyddiaeth a dderbyniodd Martha, Jac a Sianco, addasiad ffilm S4C o nofel arobryn Caryl Lewis sy’n dilyn hanes dau frawd a chwaer canol oed sy’n brwydro am eu hannibyniaeth yn dilyn marwolaeth ei mam.
“Mae’r ffilm drawiadol hon yn adlewyrchu strategaeth ffuglen S4C sy’n cynnig llwyfan i awduron a chyfarwyddwyr herio cynulleidfaoedd trwy gyfrwng cynnwys blaengar a gwreiddiol.
“Mae nifer o gynyrchiadau drama eraill S4C hefyd wedi’u henwebu, yn ogystal â rhaglenni mewn amrywiaeth o feysydd a gynhyrchwyd gan dimau talentog yn y sector annibynnol, BBC Cymru ac ITV Cymru.”
Diwedd
ENWEBIADAU BAFTA CYMRU 2009 S4C
Y Ffilm/Ddrama Orau
Martha, Jac a Sianco – Paul Jones, Lona Llewelyn Davies (Apollo, rhan o Boomerang Plus plc)
Y Gyfres Ddrama Orau ar gyfer Teledu
Caerdydd – Ed Thomas (Fiction Factory)
Con Passionate - Paul Jones, Lona Llewelyn Davies (Apollo, rhan o Boomerang Plus plc)
Y Newyddion a Materion Cyfoes Gorau
America 08: Dewi Llwyd ar Daith – Garmon Rhys (BBC Cymru)
Y Byd Ar Bedwar - Geraint Evans (ITV Cymru)
Y Rhaglen Ffeithiol Orau
Natur Cymru – John Gwyn (Cynhyrchiadau Aden)
O Flaen Dy Lygaid – Marc Edwards (BBC Cymru)
Y Rhaglen Ddogfen/Ddrama Ddogfen Orau
Rygbi: Y Gêm Agored – Ed Thomas/Dafydd Rhys/Gethin Scourfield (P.O.P.1.)
Yr Adloniant Ysgafn Gorau
Y 7 Magnifico a Matthew Rhys - Ronw Protheroe/Angharad Garlick (Boomerang Plus plc)
Y Rhaglen Gerddorol Orau
Falstaff – Yr Opera – Gareth Williams (Rondo Media)
Nodyn – Gruffydd Davies (Boomerang Plus plc)
Y Rhaglen Blant Orau
Holi Hana – Robin Lyons (Calon)
Hip neu Sgip – Hefin Rees/Gwenda Griffith (Fflic, rhan o Boomerang Plus plc)
Y Rhaglen Ieuenctid Orau
Bandit - Gruffydd Davies (Boomerang Plus plc)
Uned 5 - Nest Griffith (Antena)
Rownd a Rownd - Susan Waters/Bedwyr Rees/Robin Evans (Rondo Media)
Yr Animeiddio Gorau
Nadolig Plentyn yng Nghymru - (Cwmni Da/Brave New World)
Y Cyfarwyddwr Ffotograffiaeth Gorau: Drama
Martha, Jac a Sianco – Richard Wyn Huws (Apollo, rhan o Boomerang Plus plc)
Y Pris – Peter Thornton (Fiction Factory)
Y Camera Gorau: Heblaw Drama
Natur Cymru – Steve Phillips (Cynhyrchiadau Aden)
Yr Afon – Haydn Denman (Green Bay Media)
Y Sain Gorau
Gala Operatig Gŵyl y Faenol – Owen Thomas (BBC Cymru)
Y Cyfarwyddwr Goleuo Gorau – Dim Camera
Falstaff – Yr Opera – Bernie Davies (Rondo Media)
Gala Operatig Gŵyl y Faenol – Martyn Rourke (BBC Cymru)
Grand Slam – Tim Routledge (BBC Cymru)
Y Cynllunio Gorau
Martha, Jac a Sianco – Phil Williams (Apollo, rhan o Boomerang Plus plc)
Y Pris – Haydn Pearce (Fiction Factory)
Y Dyluniad Graffig Gorau
Byw yn yr Ardd – Departures
Cwm Glo Cwm Gwyrdd – The Bait/Owain Elidir
Lle Aeth Pawb? – Cwmni Da/Rough Collie
Y Gwisgoedd Gorau
Martha, Jac a Sianco – Dawn Thomas Mondo (Apollo, rhan o Boomerang Plus plc)
Y Coluro Gorau
Martha, Jac a Sianco – Stephen Williams (Apollo, rhan o Boomerang Plus plc)
Y Pris – Nel Bat (Fiction Factory)
Y Criw Byw Gorau
Marathon Eryri – Dylan Huws (Cwmni Da)
Y Clwb Rygbi – Cymru v Ffrainc – Siôn Thomas (BBC Cymru)
Yr Awdur Gorau ar Gyfer y Sgrin
Con Passionate – Siwan Jones (Apollo, rhan o Boomerang Plus plc)
Caerdydd – Roger Williams (Fiction Factory)
Y Trac Sain Gerddorol Wreiddiol Orau
Martha, Jac a Sianco – John Hardy (Apollo, rhan o Boomerang Plus plc)
Y Cyfarwyddwr Gorau Drama/Ffilm
Con Passionate – Rhys Powys (Apollo, rhan o Boomerang Plus plc)
Y Pris – Gareth Bryn (Fiction Factory)
Y Cyfarwyddwr Gorau
Falstaff – Yr Opera – Hefin Owen (Rondo Media)
Rygbi: Y Gêm Agored – Ed Thomas (P.O.P.1.)
Yr Actor Gorau
Martha, Jac a Sianco – Ifan Huw Dafydd (Apollo, rhan o Boomerang Plus plc)
Caerdydd – Ryland Teifi (Fiction Factory)
Yr Actores Orau
Martha, Jac a Sianco – Sharon Morgan (Apollo, rhan o Boomerang Plus plc)
2 Dŷ a Ni - Shelley Rees (ITV Cymru)
Y Cyflwynydd Gorau ar y Sgrin
Uned 5 - Mari Lovgreen (Antena)
