28 Ebrill 2008

 Mae cynyrchiadau S4C wedi ennill unarddeg o wobrau yn seremoni Bafta Cymru 2008.

Enillodd y sebon boblogaidd Rownd a Rownd y wobr am y Rhaglen Ieuenctid Orau ac enillodd Rhodri Evan gategori’r Actor Gorau am ei bortread o Balders yn Cowbois ac Injans. Daeth Calon Gaeth i’r brig yng nghategori’r Ddrama Orau/Gyfresol Orau Ar Gyfer Teledu ac enillodd Y Pris, drama herfeiddiol S4C am deulu o gangsters, y wobr am y Trac Sain Gerddorol Wreiddiol Orau.

Roedd marwolaeth Ray Gravell yn 2007 yn golled enfawr i’r byd darlledu a chwaraeon. Dangosodd tîm BBC Cymru eu doniau creadigol a’u proffesiynoldeb o dan amgylchiadau anodd wrth gynhyrchu’r rhaglen deyrnged deimladwy, Grav – Ray o’r Mynydd, a enillodd y wobr am Y Rhaglen Ddogfen/Ddrama Ddogfen Orau, ac Angladd Ray Gravell a enillodd gategori’r Criw Byw/O.B. Gorau.

Enillodd y rhaglen ddogfen unigol Fel Arall, oedd yn olrhain profiadau pobl hoyw yng Nghymru, y wobr am Y Cyfarwyddwr Gorau, i Nia Dryhurst.

Holi Hana, cyfres am hwyaden arbennig sy’n rhedeg llinell gymorth i anifeiliaid bach, enillodd y wobr am yr Animeiddio Gorau. Enillodd gwefan hwyliog Planed Plant Bach y wobr am Y Cyfryngau Newydd Gorau o Fewn Ffilm neu Deledu.

Llwyddodd rhifyn arbennig o’r gyfres Mawr, Sioe P.C. Leslie Wynne, yn y categori Adloniant Ysgafn Gorau. Enillodd y gyfres rasio pwynt-i-bwynt, Rasus ar Garlam, y wobr am Y Golygydd Gorau.

Meddai Rhian Gibson, Cyfarwyddwr Comisiynu S4C, “Rwy’n hynod o falch fod cynifer o gynyrchiadau S4C wedi dod i’r brig mewn ystod o wahanol gategorïau. Mae’r gwobrau hyn yn gydnabyddiaeth o ddoniau creadigol a sgiliau technegol ein partneriaid yn y sector annibynnol a BBC Cymru. Llongyfarchiadau i bawb.”

Diwedd

Rhestr o wobrau Bafta Cymru S4C:

Y Ddrama Orau/Gyfresol Orau Ar Gyfer Teledu

Calon Gaeth

Greenbay

Y Rhaglen Ddogfen/Ddrama Ddogfen Orau

Grav – Ray o’r Mynydd

BBC Cymru

Yr Adloniant Ysgafn Gorau

Mawr ‘Sioe P.C. Leslie Wynne’

Alfresco, rhan o Boomerang Plus ccc

Y Rhaglen Ieuenctid Orau

Rownd a Rownd

Rondo

Yr Animeiddio Gorau

Holi Hana

Calon

Y Cyfryngau Newydd Gorau o Fewn Ffilm neu Deledu

Planed Plant Bach

Cube Interactive

Y Golygydd Gorau

Rasus ar Garlam

Apollo, rhan o Boomerang Plus ccc

Y Criw Byw/O.B. Gorau

Angladd Ray Gravell

BBC Cymru

Y Trac Sain Gerddorol Wreiddiol Orau

John Hardy/Rob Love - Y Pris

Fiction Factory

Y Cyfarwyddwr Gorau

Nia Dryhurst - Fel Arall

Greenbay

Yr Actor Gorau

Rhodri Evan - Cowbois ac Injans

Rondo