26 Tachwedd 2024

Mae'r Smyrffs – y gyfres deledu ryngwladol boblogaidd i blant - ar fin dychwelyd i S4C am y tro cyntaf ers 40 mlynedd.

Mae'r sianel Gymraeg wedi prynu trwydded i ddarlledu'r gyfres animeiddiedig gan y perchennog Peyo Company. Caiff ei drosleisio yn Gymraeg gan Cwmni Da a'i dangos ar S4C o Wanwyn 2025.

Wedi'i eni mewn llyfr comig ym 1958, mae cymeriadau bach glas bach Peyo Y Smyrffs wedi diddanu cenedlaethau o blant a theuluoedd ledled y byd. Caiff y gyfres animeiddiedig The Smurfs (2021) ei darlledu ledled y byd ar hyn o bryd ar Nickelodeon, ar sianeli rhad ac am ddim lleol ac mae ar gael ar Netflix. Yn ddiweddar cyhoeddwyd y bydd ffilm Smurfs newydd a gynhyrchwyd ac a ddosbarthwyd gan Paramount Pictures / Nickelodeon Animation ac yn serennu Rihanna fel Smurfette yn cael ei ryddhau ledled y byd ym mis Gorffennaf 2025.

Meddai Sioned Geraint, Comisiynydd Cynnwys S4C – Plant a Dysgwyr; "Mae'n 40 mlynedd ers i'r Smyrffs fod ar S4C a dwi wrth fy modd y gallwn ailgyflwyno'r cymeriadau bendigedig yma i gynulleidfa newydd yn 2025.

"Mae o wedi bod yn fraint cael gweithio gyda Peyo Company i sicrhau hwn ac i gyfarfod â pherthnasau Pierre Culliford (Peyo); y dyn a greodd y Smyrffs. Mae'r cyfuniad o'u nhw cefnogaeth o ieithoedd lleiafrifol ac uchelgeisiau S4C ei hun wedi creu cartref newydd i'r Smyrffs, a dwi'n gyffrous iawn."

Dywedodd Véronique Culliford, Llywydd Peyo Company a merch Pierre Culliford (sef Peyo), crëwr y Smyrffs: "Rwy'n falch iawn o'r lansiad hwn sydd ar ddod ar S4C. Mae gweithio gydag ieithoedd lleol wedi bod yn ganolog i ni erioed a'r fersiwn newydd hwn yn y Gymraeg fydd y 50fed iaith i'n cyfres deledu! Gall plant a rhieni ddisgwyl llawer o hwyl yn gwylio Y Smyrffs ar S4C. Mae'r Smyrffs yn ôl!"

Caiff manylion pellach eu cyhoeddi yn y flwyddyn newydd.